நீலச்சிங்கமும், குவாண்டம் இயற்பியலும்

“அப்பா, ஒரு கொஸ்டின்” பரோடா ரயில்வே நிலையத்தில் ஷதாப்திக்கு காத்திருக்கையில், அருகில் தமிழ்க்குரல் கேட்கத் திரும்பினேன். “ப்ரணவ், பேசலாம். நீ மொதல்ல அந்தக் கடையில ஸி 6 கோச் எங்க வரும்னு கேட்டுண்டு வா. ரன்” சொன்னவருக்கு நாற்பது வயதிருக்கும். முன் தலையில் வேகமாக வழுக்கை விழுந்திருந்தது. அவர் பையன் பதின்மவயதினன். வயதுக்கு அதிகமாக மீசை தாடி வளர்ந்திருந்தது. ஒரு பையைத் தோளுக்குக் குறுக்கே அணிந்திருந்தான். ”அவன் பேசறப்போ ஏன் இப்படி கட் பண்ணறீங்க?” சிடுசிடுத்தப் பெண்மணியின் கையைப்பிடித்துத் தொங்கிக்கொண்டிருந்தது ஒரு சிறு பெண். “ அறுக்கறாண்டி. ஏதோ பிசிக்ஸ்ல கேள்வியா இருக்கும். இல்ல, பயாலஜில... நான் படிச்சு எத்தனை வருஷமாச்சு? இப்பவும் அவன் என்னமோ அவன் கிளாஸ் டீச்சர்னு நினைச்சுகிட்டிருக்கான்” சுவாரஸ்யமாக இருக்கவே காதைத் தீட்டினேன். . ”அப்பா, ஸி 6 இங்கதான் வருமாம்.. இப்ப கேக்கட்டுமா?” “சரி” என்றார் அவர் பெருமூச்செறிநதவாறே. “ ஹைஸன்பர்க் அன்செர்டனிடி ப்ரின்ஸிபிள்னு படிச்சேன். நாம ஒரு எலக்ட்ரானோட இடத்தைச் சரியா கணக்குப் போட்டோம்னா, அதுனோட சக்தி எவ்வளவு இருக்கும்னு தெரியாதாம். சக்தியைக் கண்டுபிடிச்சா, இடம் சரியா தெரியாதாம். எப்படிப்பா?” “ம்... அது..அப்படித்தாண்டா. அதுக்குப் பின்னாடி பெரிய கால்குலஸ் கால்குலேஷன்லாம் இருக்கும் தெரியுமோ? சும்மா, இந்த வாழைப்பழம் ஒரு ரூபாய்ங்கற மாதிரி சிம்பிளா சொல்லிட முடியாது.” “நோ. அப்பா, டெல் மீ! ஏன் எலக்ட்ரான் இந்த இடத்துலதான் இருக்கும்னு சரியா சொல்லமுடியாது? ஒரு பஸ் 60 கிமீ வேகத்துல வந்தா, ஒரு மணி நேரத்துல 60 கிமீ தூரத்துல அதை பாக்க முடியுமே? அதுமாதிரி...” அவர் பரிதவித்தார். புன்னகையுடன் அவனை ஏறிட்டேன் “ நான் முயற்சிக்கட்டுமா?” அவர்கள் இதனை எதிர்பார்க்கவில்லை போலும். அவன் சந்தேகமாக என்னைப் பார்த்தான். வந்துகொண்டிருந்த ஷதாப்தி க்றீச்சிட்டு வேகம் குறைந்தது. “ஸி 6 இங்க நிக்கும்னு போர்டு போட்டுருக்கான் பாரு. அது எங்க சரியா நிக்கறதுன்னு சொல்லு.” என்றவாறே, என் சூட்கேஸை எடுத்தேன்.. கொஞ்சம் முன்னாடி சென்று எஸ் 6 நிற்க, சற்றே ஓடிப்போய் ஏறினோம். நான் பின்னால் இருக்கும் ஸீட்டில் அமர்ந்தேன். இருக்கைகள் காலியாக இருந்தன. . இரு நிமிடத்தில் அந்தப் பையனும் அவன் அப்பாவும் என் அருகே இருந்த ஸீட்டில் வந்து அமர்ந்தனர். “ஸாரி. ஒரேடியாப் படுத்தறான். நீங்க என்னமோ கேட்டுட்டு விட்டுட்டீங்க. அவன் “ அந்த அங்கிள்ட கேக்கணும். நீயும் வான்னு இழுத்துண்டு..” ”ஓகே” என்றேன் “ எங்க நின்னது?” “கொஞ்சம் முன்னாடிப் போய். சரியா போர்டு போட்ட இடத்துல இல்லை” “போர்டு சொல்றது, தோராயமா இங்க நிக்கும்னு மட்டும்தான். துல்லியமா ,மில்லிமீட்டர் அளவுக்கு இடத்தை அளவிட முடியாது. கொஞ்சம் வேகம் குறைந்தா, சரியா அந்த இடத்துக்குப் பக்கத்துல நிப்பாட்ட முடியும். வேகமா வந்தா?” “இன்னும் முன்னாடிப் போய் நிக்கும். கரெக்ட் இடத்துல நிக்காது” “ஸோ, சக்தி அதிகமா இருந்தா, அதனோட இடத்துல சரியா கவனிக்க முடீயாது. இடத்தை விட்டுட்டு, சக்தியைப் பார்த்தோம்னா, அது போற ஸ்பீட்ல , ஆற்றலை மதிப்பிட முடியாது. இப்ப நாம சந்திரன்லேர்ந்து பாக்கறோம்னு வை. எஸ் 6 போர்டு பக்கத்துல இருக்கிறதை, சரியா அங்கே நிக்கிறதாத்தான் நினைப்போம். துல்லியமாக் கணக்கிடப் போனாப் பலதும் சரியா இருக்காது” “இதுதான் ஹைஸன்பர்க்....” அவன் இழுத்ததும் இடைமறித்தேன் “ இல்லை. ஒரு உவமையாச் சொன்னேன். இப்ப சந்திரனுக்கும் நமக்குமுள்ள தூரம், சைஸை , நமக்கும் எலக்ட்ரானுக்குமா நீட்டிப் பாரு. ஏதோ புரியற மாதிரி இருக்கும். ஆனா, இது புரிய நீ பலதும் படிக்கணும்” அவன் ஒரு திருப்தியுடன் சீட்டின் சாய்ந்தான். புன்னகையுடன் அவனப்பாவைப் பார்த்தான். “சார், நான் கெமிக்கல் எஞ்சினீயர். அந்த காலத்துல..” “என்னை விடச் சின்னவர்தான் நீங்க” என்றேன். ”எனக்கு வேற பொழுது போக்கில்லை. ஸ்கூல, காலேஜ்ல புரியாததை வேற விதமாப் படிச்சுப் பாக்கறேன். நான் சயண்டிஸ்ட் இல்லை. சயன்ஸ் ஆர்வலன் அவ்வளவுதான்” ” ரொம்ப அறுத்துட்டானோ? ரொம்ப அதிகமாப் படிக்கறான். பயமா இருக்கு. லூசாயிருவானோன்னு.” “பெருமைப்படுங்கள்” என்றேன் “ புத்தகம் தேடிப் படிக்கறானே? அதுவே பெருசு” “அங்கிள். Can you recommend some books in physics?" என்றான் அந்தப் பையன் ‘Feynman லெக்சர்ஸ் படிக்கலாம் “ என்றேன் சற்றே யோசித்து. இரு நிமிடங்களில் ஐ பேடில் எங்கோ அது கிடைக்குமிடமும், விலையும் ப்டித்து விட்டான் “ அப்பா, என் பர்த்டே கிஃப்ட் இது வாங்கிக்கொடு. ப்ளீஸ்” அவர் ”சரி”என்றார். அவன் அம்மா அழைக்க எழுந்து போனான். “சொல்றேனேன்னு நினைக்காதீங்க. இந்த வறட்டு அறிவியலால் என்ன பயன்? இதுக்கு python,ஜாவான்னு கோடிங் படிச்சா பயன்படும். . H1B ஈஸியா இருக்கும்லயா?” சொன்னவரை ஆயாசத்துடன் பார்த்தேன். ”அறிவியல் பயன்பாடு எல்லாமே டாலரில் பார்க்கவேண்டாம் என்பது என் கருத்து. அறிவை விட அறிவுத் தாகம் பெரிது: அறிவியலை விட அறிவியல் உணர்வு பெரிது. Quest for knowledge is greater than knowledge itself: Scientific temperament is greater than science. இந்த தேடுதல் அவனைப் புதுவிதமாகச் சிந்திக்க வைக்கும். ஒவ்வொரு சவாலையும் அறிவுபூர்வமாகச் சிந்திப்பான். வாழ்வுத்தரம் வளம்பெறும். அவன் தேடுவதைத் தடுக்காதீர்கள்” அவர் முகம் மாறியது. பிடிக்கவில்லை போலும். அவர்கள் அனைவரும் எனது இருக்கையின் பக்கத்து வரிசையில் அமர்ந்தனர். மடியில் எதுவே தட்டுப்பட்டது. அவனது தங்கை அருகில் நின்றிருந்தாள். ஒரு ட்ராயிங் புக்கை என் மடியில் வைத்து, சற்றே அசைத்தாள். “என்னம்மா?” என்றேன். அது ஒன்றும் பேசாமல் என் கையில் கொடுத்துவிட்டு, ஓடிப்போய் அம்மாவின் மடியில் சாய்ந்து படுத்துக்கொண்டு, வாயைத் திறந்தபடியே, என்னைப் பார்த்துக்கொணிட்ருந்தாள். “அவளுக்கு வெக்கம். உங்ககிட்ட அவளும் பேசணுமாம்” என்றார் அவள் தாய். பேப்பரில் நீலநிறத்தில் ஒரு சிங்கம் வரைந்திருந்தாள். அதனருகே ஒரு மனித உரு.கண்ணாடியும், தாடியுமாய். அவள் என்னைப் பார்த்துக் கைகாட்டினாள் :அடேயப்பா!, நீலச் சிங்கம் பக்கத்துல அங்கிள் நிக்கறேனா?” “இல்லை”என்பதாகத் தலையசைத்தது. மீண்டும் என்னை நோக்கிக் கைகாட்டியது. “நீங்கதான் அந்த ப்ளூ சிங்கமாம். அவளூக்கு பிடிச்ச மிருகம் லயன். பிடிச்ச கலர் ப்ளூ.” சட்டென நெகிழ்ந்து போனேன். குழந்தைகளிடம் எனக்கு மிக இயல்பாகப் பழக வராது. உள்ளுணர்வு சட்டெனத் தோன்றி ஒரு திரையை இட்டுவிடும். மவுனமாக இருப்பேன் அல்லது விலகிப் போய்விடுவேன். ஒன்றுமே தெரியாத ஒருவனை தனக்குப்பிடித்த லயன், நீலக்கலரில் தோய்ப்பது களங்கமற்ற உள்ளத்திற்கே சாத்தியம். இவளுக்கு எப்படி நன்றிசொல்வது? “She is seeking your attention.” சிரித்தார் அவளது தந்தை. “ கொஞ்சம் ஷை டைப். நீங்க அவனைப் பாராட்டியதும் தன்னையும் ரெண்டு வார்த்தை பாராட்டிச் சொல்லணும்னு தோணியிருக்கு” என்றார் அவளது தாய். எனக்குப் புரிந்தது. தனது மற்றொரு மகவும் கவனிக்கப்படவேண்டும்/ பாராட்டப்படவேண்டுமென்பது தாயின் ஆசை. “ரொம்ப நல்லா வரைஞ்சிருக்கியே? எனக்கும் லயன் பிடிக்கும். என் வீட்டுல அபிஜித்னு உனக்கு ஒரு அண்ணா இருக்கான். அவனுக்கும் லயன் பிடிக்கும்” அந்தப் பெண் ஒன்றும் பேசவில்லை. முகமெல்லாம் சிரிப்பாக அம்மாவீன் மடியில் தலை புதைத்துக்கொண்டது. சிறிது நேரத்தில் உறங்கிப் போனேன். போரிவில்லியில் அவர்கள் முன் புறம் இறங்கிப் போக, அவசரமாக பின்கதவின் வழியே இறங்கி, வெளியே ஆட்டோ பிடிக்கையில் அந்த நீலச் சிங்க ஓவியம் நினைவில் வந்தது. எடுக்காமல் வந்துவிட்டேனே? அந்தப் பெண் ட்ராயிங் புக்கை எடுத்துச் சென்றிருக்க வேண்டும் என வேண்டினேன். குப்பையில் போகக்கூடாது. யதார்த்த உலகில் குவாண்டம் பிசிக்ஸ் அறிய முயலும் ஆர்வமும், அன்பை ஈர்க்க முயலும் சிறு முயற்சிகளும் அற்பமாகத்தான் படும்.
https://srimangai.blogspot.in/2018/04/blog-post.html?m=1

நேரா யோசி அத்தியாயம் 14 – பல்முனை இயக்கம்.

”கணேசன் மாதிரி வேலை பாக்கணும். நம்மகிட்ட பேசிட்டிருக்கறப்பவே, லெட்ஜர்ல எண்ட்ரி போட்டுருவாரு. நாம வேலைய ஆரம்பிக்கிறதுக்கு முன்னாடியே அவர் வேலையை முடிச்சுட்டு, பாஸ் கேபின்ல போய் ஒக்காந்துருவாரு. ஏன் ப்ரமோஷன் கிடைக்காது?”

” கைக்கு கை: வாய்க்கு வாய்-ன்னு இருக்கணும். பேசிக்கிட்டே இருக்கும்போது நம்ம வேலையைப் பாத்துகிட்டே போணும்”

ஒரே நேரத்தில் பல்வகை இயக்கத்தைச் செய்பவர்க்களை உலகம் வியக்கிறது. முன்னேறும் தகுதியில் இது ஒன்று எனச் சிலாகிக்கிக்கிறோம்.காணும்போது, அவர்கள் பல வேலைகளை ஒரேநேரத்தில் செய்து முடித்துவிடுவதைப் போலத் தோற்றமளிக்கிறது.

ஆனால் இது ஒரு பிறழ்வு என்கிறார்கள் வல்லுநர்கள். மல்ட்டி டாஸ்க்கிங் என்பது மூளையையும் உடல் உறுப்புகளையும் அதிகப் பளு தந்து அயர்வடையைச் செய்யும் தவறான பழக்கம் என்பது பல உளவியல் ஆய்வாளர்களின் முடிவு.

அஷ்டாவதானி, தசாவதானி என்று எட்டு / பத்து வேலைகளை ஒரே நேரத்தில் செய்பவர்களை வியக்கும் நமக்கு, அவர்கள், அந்த்த் திறமையால் பெற்ற பயன்களைப் பற்றித் தெரியாது.  வாழ்வில்  ஒரே வேலையைத் தடுமாற்றத்துடன் செய்பவர்க்ளைப் போல சராசரியான வெற்றிகளையே அடைந்திருக்கிறார்கள். பல வேலைகளை ஒரேநேரத்தில் செய்வதிலுள்ள சிக்கல் என்ன?

ஒரு வேலையை நம் மூளை கிரகிக்கும்போது, ஹிப்போகேம்பஸ் என்ற பகுதி முன் அனுபவங்கள், முன்பு பெற்ற தகவல்களை முன்னெடுத்து, சமீபத்தில் பெற்ற தகவல்களோடு ஒப்பிட்டுப் பார்க்கிறது. புரிதல், அறிதல், புரிதலின் வேறு பரிணாமங்கள்,  முன்பு தவறாகப் புரிந்ததினை, அல்லது தற்போது தவறாக வரும் தகவல்களை இவ்வொன்றையும், மூளை படுவேகமாக கிரகித்து எதிர்வினையாற்ற முயல்கிறது.

ஆனால் மூளை என்பது ஒரு சோம்பேறி. எத்தனை குறைவான ஆற்றல் செலவிட்டு, அதிகமாக பலன்கிடைக்கும் ? என்ற கணக்கிலேயே எப்போதும் அது இருக்கும். எனவே பல சமிக்ஞைகள் ஒரே நேரத்தில் கிடைத்தால், தானியங்கு நிலையில் எத்தனை பணிகளைச் செய்ய முடியுமென தீர்மானித்து, அந்தந்தப் பகுதிக்கு அனுப்பி வைக்கும். இயல்பாக காபி டம்பளரை எடுத்தபடியே மில்லியன் டாலர் ப்ரச்சனைகளை அலசுபவர்களுக்குக், கை செய்யும் வேலை பற்றிய கவனம் அதிகமிருக்காது. சிலர் போனில் பேசும்போது, காகித்த்தில் ஏதோ வரைந்தபடியே இருப்பார்கள். அல்லது தலைக்கு மேல் கையைத் தூக்கி, நெற்றியை வருடியபடி.. இந்த ஆக்க நிலை அனிச்சைச் செயலை மூளை தானியங்கி நிலைக்குத் தள்ளி விடுகிறது.

எல்லாச் செயலையும் இப்படி மூளையால் அனிச்சைச் செயலுக்குத் தள்ள முடியாது. உணர்வும், மூளையின் சில பகுதிகளும் கவனத்தினை அதிகம் கையாள வேண்டியிருக்கிறது.

உதாரணமாக,  ஒருவரை ஒரு போன் உரையாடலின் போது,  நாலிலக்க எண்கள் இரண்டைப் பெருக்கிக் காட்டச் சொல்லுங்கள். மிகக் கடினம்.

சமையலறையில், பொருட்களைத் தேடும்போது, இந்தப் பெருக்கலோ, கூட்டலோ கடினம். ‘இருடா, வேலைல இருக்கேன்ல” என்று பதில் வரும். அதேநேரம், உப்புமாவுக்கு ரவை வறுத்துக்கொண்டிருக்கையில், மூளையால் இந்தப் பெருக்கலைப் போட்டுவிட முடியும். மூளை, ஆக்க நிலை அனிச்சைச் செயலாக, ஒரு தானியங்கி நிலையில் கைகளை, வாணலியில் வேலை பார்க்க விட்டுவிடுகிறது. தேடும்போது, கவனம் வேண்டியிருக்கிறது. காண்பதை கிரகித்து, முன் நினவுகளின் தகவல்நிலையில்,அந்தப்பொருளைப் பொருத்திப்பார்த்து “இதுதான்/ இது இல்லை” என்று சொல்லவேண்டியிருக்கிறது. இதற்கு மூளைக்கு கவனம், ஆற்றல் குவியம் தேவைப்படுகிறது. எனவே பெருக்கல் அந்த நேரத்தில் இயலாத ஒன்று.

இதனை கானேமான் ‘சிஸ்டம் 1 மற்றும் சிஸ்டம் 2ன் வேலைத்திறன்” என்பதாகத் தனது நூலில் குறிப்பிட்டார். எதனை சிஸ்டம் 1க்குத் தரவேண்டும், எதனை 2க்குத் தரவேண்டுமென்பதை சிறுபாலர்கள் அறியமாட்டார்கள். அவர்களது மூளை இந்தப் பதப்படுத்தலில் இன்னும் ஈடுபடாத நிலையில், சிஸ்டம் ஒன்றிலிருந்தே பதில் சொல்ல எத்தனிப்பார்கள்.  எனவே, கேள்வி கேட்டால், டக்கென தவறாகப் பதில் சொல்லும்போது, “அவசரக் குடுக்கை, நல்லா யோசிச்சுப் பதில் சொல்லு” என்றெல்லாம் சொல்லவேண்டியிருக்கிறது. இது அவர்களது மூளை பல்திறம்பட்ட வேலைகளில் ஒரே நேரத்தில் ஈடுபட எத்தனிப்பதால் வருவது மட்டுமல்ல; அவர்களுக்குத் தூண்டும்பொருளின் ஆழம் புரியாத்தால், எந்த நிலையிலிருந்து பதில் சொல்லவேண்டுமெனத் தெரியாத்தில் வரும் குழப்பம்.

அனுபவம் பெற்ற பின்னும் இது தொடர்வதற்குக்க் காரணங்கள் இரண்டு.

1. எதிர்வினையாற்ற வேண்டிய பதட்டம், அழுத்தம், உணர்வுக் கொந்தளிப்பு, நம்மை ‘child’ மனநிலையிலிருந்து பதில் சொல்ல வைக்கிறது. இந்த அநிலையில் கேள்விகளை உள்வாங்கி, சரியாகப் புரிந்து, பகுத்தாய்ந்து, நிலைத்தகவல்களிலிருந்து தகவலைத் தேடி, பொருத்திப் பார்த்து,நிலமைக்குத்தக்கவாறு எதிர்வினையாற்றும் முதிர்வு அந்த நேரத்தில், சைல்ட் மன நிலைப்பாங்கால் மழுங்கடிக்கப் படுகிறது. இது உணர்வு பூர்வமான மன நிலை எதிர்வினை. இது பற்றி விரிவாகப் பின் ஆராய்வோம். 

2. பல்திறம்பட்ட செயலாற்றம்.  ஒரே நேரத்தில் பலதரப்பட்ட வேலைகளில் மூளை ஈடுபடும்போது, அது குவியத்துடன் ஆற்ற வேண்டிய வேலை ஒன்றினை மட்டுமே முக்கியமாக ஏற்றுக்கொண்டு, பிறவற்றைத் தானியங்கி நிலையில் தள்ளிவிட எத்தனிப்பதை சற்று முன் கவனித்தோம்.  எனவே, ஒரு நேரத்தில் ஒரு வேலையை மட்டுமே மூளையால், குவியத்துடன், உணர்வுடன் ஒருங்கிணைந்து செயலாற்ற முடியும். ஒரே நேரத்தில் குவியம், உணர்வு வேண்டிய பலவேலைகள் வரும்பொழுது, மூளை சிலவற்றைக் கவனத்திலிருந்து கழற்றி விட்டுவிடுகிறது. இதன் விளவு, தோல்விகள், ஏமாற்றம், கோபம். இயலாமை உணர்வு.

ஒரே நேரத்தில் பல வேலைகள் வரும்போது, நாமே தன்னுணர்வுடன் எதனை முக்கியமாக, உடனுக்குடன் செய்யவேண்டிது? எனத் தீர்மானித்து, ஒரு பட்டியலிடுவது நன்று. அடுத்தடுத்த சவாலான வேலைகளை, மூளை தானே நினைவிலிருந்து மறக்கச் செய்கிறது. எனவேதான், பட்டியலிடுவது அவசியம்.

பல் வேலைகள் வரும்போது, அவற்றின் முக்கியத்தின், அவசியத்தின் அடிப்படையில் பட்டியலிட்டுச் செயலாற்ற முனைவது, நேரா யோசிப்பதின் ஒரு இன்றியமையாத அங்கம்.

Reference:

http://jonathanbecher.com/2014/04/14/five-cognitive-distortions-people-get-stuff-done

http://jonathanbecher.com/2017/06/25/the-3-laws-of-probability-everyone-should-know/

குரு

காலை 8.55.  சாரதி இன்னும் வரவில்லை. அதுவே சரியான சகுனமில்லை. மீட்டிங் 9மணிக்குத் தொடங்க வேண்டுமென்றால் 8.45க்கு  அங்கு இருப்பார்.

9 மணிக்கு  உள்ளே வரும்போதே “ரோஹன்” என்றார். அவன் எழுந்து நிற்குமுன் “நொய்டா –ல சந்திராவோட கம்பெனிக்கு ஒரு ஆர்டர் கிடைச்சிருக்காமே? ஏன் உன் ரிப்போர்ட்ல இல்ல?”

ரோஹன் உதடு உலர்ந்தான். எது வேண்டுமானாலும் மன்னிக்கப்படலாம். சந்திராவின் கம்பெனிக்கு ஆர்டர் போனது மன்னிக்க முடியாத குற்றம். அது தெரியாமலிருப்பது தூக்குத் தண்டனை விதிக்கக்கூடிய அளவிலானது.

சந்திரா என்ற சந்திரசேகர், எங்கள் கம்பெனியிலிருந்து விலகிப் போய்ப் போட்டிக்கம்பெனி ஆரம்பித்து இருவருடங்களாகிவிட்டது. அதுவும் எங்கள் வாடிக்கையாளர்களையே குறிவைத்துப் புது மென்பொருள் விற்பது, நிறுவுவது, சேவை தருவது என்பதில் முனைப்பாக இருந்தார். ஒரு உட்பூசலில், ஒரே மணி நேரத்தில் வெளியேறியவர் எப்படி இரு மாதத்தில் ஒரு கம்பெனியை முழுமூச்சாகக் கொண்டு வந்தார்? என்பது புதிராகவும் அச்சமாகவும் இருந்தது.

இதெல்லாம் கவலைப்படாமல் சாரதி , ஒவ்வொரு பிரச்சனைக்கும் மகாபாரதம், இராமாயணம் என்பதிலிருந்து மேற்கோள் காட்டி, ஆலோசனை சொல்லுவார். போரடித்து நிற்போம். இப்போதைக்கு, கம்பெனிக்கு மிகப்பெரிய அச்சுறுத்தல், அவரது அடுத்த நிலையிலிருந்து வெளியேறி இருக்கும் சந்திரா. போகும்போதே “இந்த கம்பெனியையும், அந்த ஆன்மீக சொற்பொழிவாளரையையும் மார்க்கெட்லேர்ந்து வெளியேற்றி விட்டுத்தான் வேறவேலை” என்று சூளுரைத்துப் போயிருந்தார். அதன்படியே நடக்கவும் செய்கிறார்.

 “சந்திரா நம்முடைய விலையை விட 10% குறைத்துக் கொடுக்கிறார். நாம இன்னும். 20% குறைத்து விற்றால் ஆர்டர் கிடைக்கும்” என்றான் ரோஹன்.

“இன்னும் 10 % குறைத்தாலே, நமது லாபங்களில் அடிவிழும். லாபமில்லாம விற்பது தற்கொலைக்குச் சமம். நம்மை நம்பி இருக்கிறவங்க வேலை போகும். அது கொலைக்குச் சமம்.  வேற ஐடியா இருந்தா சொல்லுங்க”

ரோஹன் கைகளை இயலாமையில் விரித்தான். சாரதி போர்டில் இந்திய வரைபடத்தின் எல்லைக்கோடுகளை வரைந்தார். ”இங்க சொல்லுங்க. நம்ம வாடிக்கையாளர்கள் எங்கெங்க இருக்காங்க?”

நாங்கள் சொல்லச்சொல்ல அவர் புள்ளி வைத்துக்கொண்டே வந்தார். “ ஆக, மேற்கு, வடக்குல கொஞ்சம் ஸ்ட்ராங்கா இருக்கோம். இப்ப , சந்திராவின் ஆர்டர்கள் கிடைத்திருக்கும் இடங்களைச் சொல்லுங்க.” புள்ளி வைத்ததும் சற்றே விலகி நின்றார்

“வடக்கே நொய்டா, கிழக்கே அஸ்ஸாம், கொஞ்சம் மேற்குப்பக்கம், நம்ம கஸ்டமரையே அடிச்சு எடுத்தது.. இதுதவிர ஒரு பொதுத்தனம் ரெண்டு கம்பெனிக்கும் தெரியுதா?”

சிவஞானம் “ தெற்கே நாமளும் வீக், அவனும் வீக்” என்றார்.

“எக்ஸாக்ட்லி! ஆர்ட் ஆஃப் வார்’-ல சன் ஸூ ( Sun Tzu) சொல்றான் “ உன்னை அறியும் அதே அளவு எதிரியை அறிந்துகொள்.” இப்ப ரெண்டு இடத்துல புது ப்ராஜெக்ட் வருது. கொச்சி, குவஹாத்தி. ரெண்டு இடத்துலயும் பாத்தா, நாமும் அவனும் பலத்துல சரியாக இருக்கறது தெற்கே மட்டும்தான். கிழக்குல அவன் ஸ்ட்ராங். அந்த டெண்டர் நாம பங்கெடுக்க வேண்டாம்”

“ஏன்? ‘ என்றார் கல்கத்தா ப்ராஞ்ச் மேனேஜர் முகர்ஜீ கொதித்தெழுந்து “ எங்களுக்கு ஒரு ஆர்டரும் வரலை. இந்த டென்டருக்கு நீங்க ஒத்துழைக்கணும், சாரதி ஜி”

“முகர்ஜீ” என்றார் சாரதி “ சன் ஸூ சொல்றான், ”எங்கு நீ 10 பேரும் எதிரி 1000 பேரும் இருக்கிறீர்களோ,அங்கு போர்செய்யாது விலகிவிடவேண்டும்; எங்கு நீயும் அவனும் சமபலத்துடன் இருக்கிறீர்களோ, அங்கு அவனை தந்திரமாக வளைத்து தாக்க வேண்டும்; எங்கு நீ பலத்தில் அதிகமிருக்கிறாயோ, அங்கு அவனை முழுதும் அழிக்க வேண்டும்.” நாம் கிழக்கில் பலவீனர்கள். நமது பலத்தைத் தெற்கே கூட்டி அங்கு அடிப்போம்.”

“தொடங்கிட்டான்யா” என்று முணுமுணுத்தார் முகர்ஜீ.

எனக்கு ஒன்று உறுத்திக்கொண்டே இருந்தது. அகமதாபாத், பரோடா, சண்டிகார்.. எத்தனை ஆர்டர்களில், நம்மை எடுத்துவிட்டு, மிகக்குறைந்த விலையில் சேவை ஆர்டர்களை சந்திரா எடுத்திருக்கிறான்? ஒரு மூச்சுப் பேச்சில்லை, அது குறித்து..

இருநாட்களில் கொச்சி ஆர்டர் சந்திராவுக்குச் சென்றதாகத் தகவல் கிடைத்தது. சாரதியின் கேபினில் அனைவரும் கூடினோம்.

“ஆட்களின் தேவை அதிகம் இருக்கு சந்திராவுக்கு. புதுசா 20 பேர் பணியில் எடுத்திருக்கிறார். டெல்லி, கவுஹாத்தி..” என்றார் மனித வள அதிகாரி கோம்ஸ்.

“கூட்டுறவு வங்கி ஒன்றில் 4கோடி கடன் எடுத்திருக்கிறார்” சாரதி சற்றே தலை நிமிர்ந்தார். ” எந்த வங்கி? “ விவரத்தைச் சேகரிக்கச் சொன்னார். கடுப்பானேன். இது முக்கியமா இப்போ?

 “கோம்ஸ், எத்தனை பேர், எந்த மாசம், வருஷம் சேர்ந்திருக்கிறார்கள்?”

கோம்ஸ் கொடுத்த விவரப்படி ,சாரதி ஒரு காகிதத்தில் கிராஃப் வரைந்தார்.

மொத்த ஆட்கள், போன வருசம் மார்ச்ல 20, மே – 35, ஜூன் – 45 – மிக அதிகமாக ஆளெடுத்த மாதங்கள். “ஆனா இதே நேரம் அவனது புது வாடிக்கையாளர்களின் எண்ணிக்கை அதிகரித்திருக்கிறது.”

”தெரியும்” மனதுக்குள் சொல்லிக்கொண்டேன் “அந்த நேரம்தான் நீங்கள் முட்டாள்தனமாக மும்பை, சண்டிகார், அகமதாபாத் ஆர்டர்களை இழந்தீர்கள் சாரதி. மஹாபாரதமும், இராமாயணமும் சோறுபோடாது. வேலை பார்க்கணும்”

”நன்றாகக் கவனியுங்கள் ‘ என்றார் சாரதி . ஆட்கள் பலம் Y அச்சிலும், காலத்தை Xஅச்சிலும் இட்டு, ஒரு கிராஃப் வரைந்தால், அவன் பலம் சீராக கூடி வளர்ந்திருக்கிறது..

“இது ரொம்ப முக்கியம்” என்றேன் மனதுள். எப்ப இந்த சாரதி போகிறாரோ அப்போதான் கம்பெனி உருப்படும்.

“குரியாக்கோஸ்” சாரதி அழைத்தார், “அந்த கிளையண்ட்டுகிட்டே, நாங்க 15 நாளில வேலையை ஆரம்பிக்கறோம். சந்திராவோட விலைக்கு 5 % மட்டுமே அதிகமா இருக்கோம்” என்று சொல்லுங்கள்”

குரியாக்கோஸ் முழி பிதுங்கினார் “ ரெண்டு பேர்தான் கொச்சியில இருக்காங்க சார். நாம எப்படி அந்த ப்ராஜெக்ட்ல? குறைஞ்சது 20 பேர் வேணும்.”

”தெரியும்” என்றார்  சுருக்கமாக. “நான் நாளைக்கு ப்ளைட் பிடிச்சு வர்றேன். அந்தக் கம்பெனி டைரக்டர்கிட்ட எனக்கு அப்பாயிண்ட்மெண்ட் வாங்குங்க”

சந்திரா அங்கும் முந்தினார். இன்னும் 20% விலைகுறைத்து ஆர்டரை எடுத்தார். இரு மாதங்களின் பின் சாரதியின் அறையில் கூடினோம்.

“சார், ஒரு தகவல்” என்றார் மனிதவள மேலாளர்.  “ நொய்டா, குவஹாத்தியிலிருந்து கொச்சி கம்பெனிக்கு ஆட்களை அனுப்புகிறார் சந்திரா. வேலை சங்கனாச்சேரியில். நிறைய ஆட்கள் நமது கம்பெனியில் வேலைக்கு அப்ளை செய்திருக்கிறார்கள்”

சாரதி புன்னகைத்தார் “ வடக்கு,கிழக்கு மாநிலத்தவருக்குக் கேரளா உணவு ஒத்துக்கொள்ளாது. கல்ச்சர் வேறுபாடு அதிகம். மொழி ப்ரச்சனை. ஒரு வாரத்தில் எத்தனை பேரை அப்படி கொச்சிக்கு அனுப்பிருக்கான்?”

”15 பேர். மொத்தம் இருவது பேர் அந்தப்ப்ராஜெக்டுக்கு வேண்டும்”

சாரதி எழுந்தார். ”இப்போ கிராஃப் வரைவோம். ஒரு வார காலத்தில் 15 பேர்.” திடீரென , அந்த் கிராஃபில் கோடு எழுந்திருந்தது.

”இதற்கு முன் கோடுகள் சாய்நிலையில் மெல்ல மெல்ல உயர்ந்திருந்தன. பலத்தை அவன் வெளியிலிருந்து கூட்டுகிறான் என்பது தெளிவு. பணபலம்- அந்த வங்கி, ஆட்கள் சேர்த்தல் - அவனது முதலீடு. அந்த நிலையில் அவனது போர் ஆற்றல் அதிகம்.

இப்போது திடீரென பலம் உயர்வது வெளியிலிருந்து வரும் உதவியில்லை. வேலை அழுத்தத்தினால், தனது பலத்தையே ஒரு இடத்தில், ஒரு காலத்தில் திரட்டுகிறான். இது  அவனால் பல நாள் நின்று தாக்கிச் சமாளிக்கக் கூடிய வலிமையல்ல.”

சாரதி , கொச்சியை அழைப்பார் என எதிர்பார்த்தேன். சண்டிகார், குவஹாத்தியில் சந்திராவின் கஸ்டமர்களைத் தொடர்பு கொண்டார் “உங்கள் வேலை நின்றுவிட்டதா? அடடா! கவலைப்படாதீர்கள். நாங்கள் செய்து தருகிறோம். என்ன, அவனுக்குக் கொடுத்ததை விட 5% அதிகம் தந்தால் போதும். அட, நாளைக்கே தொடங்குகிறேன். குவ்ஹாத்திக்கு மட்டும் ஒரு வாரம் கொடுங்க”

 “கோம்ஸ், அந்தக் கம்பெனியில் அஸ்ஸாம், டில்லிலேர்ந்து எவனெல்லாம் அப்ளை பண்ணியிருக்கானோ,  அதே இடத்துல  வேலைக்கு எடுங்க. ஒரு வருஷம் பாண்ட் எழுதி வாங்கிருங்க”

ஒருவாரம் கழித்து “ கொச்சியில, சந்திராவோட ஆர்டரைக் கேன்ஸல் பண்ணி நமக்குக் தர்றாங்க. நான் மறுத்துவிட்டேன். தெற்கே ஆளில்லை” என்றார் சாரதி.

“அப்புறம் ஏன் கொச்சிக்கு இத்தனை முக்கியத்துவம் கொடுத்தீர்கள்?” என்றேன்.

”அது மாரீசன். மாயமான். குவஹாத்தியை விட்டு நாம அங்க போறோம்னதும், துரத்திக்கொண்டே வந்து ஏமாந்தான் சந்திரா. கொச்சியை நான் எப்பவுமே கணக்கில் எடுக்கவில்லை. குவஹாத்தி,டெல்லி நமது பலம். தெற்கே மெல்லப் போவோம்” என்றார் சாரதி.

மதியம் இருவரும் உலாவச் சென்றோம். “சந்திரா திவாலாகிவிட்டான்” என்றார் சாரதி “சொத்து முழுதும் போய்விட்டது. கம்பெனிகள் அவன் மீது வழக்குத் தொடர்ந்திருக்கின்றன”

சற்றே பெருமூச்செறிந்தார் “ என் தம்பி மாதிரி அவனை கம்பெனியில வளர்த்தேன். கொஞ்சம் நிதானமாக நடந்திருந்தால் என் போஸ்ட்டுக்கு இப்ப வந்திருப்பான்.”

“நீங்க கம்பெனி விசுவாசம் பாத்தீங்க. அடிச்சுப்போட்டு, இப்ப  அழறீங்க?” என்றேன்.

“ஆம்” என்றார் சாரதி “இது அர்ஜூன்னும் பீஷ்மரும் எதிரெதிரே போரிட வந்த துர்ப்பாக்கிய நிலை. நான் அவனை அடிக்கக் காலம் தாழ்த்திய்தை நீங்கள் நகையாடினீர்கள். தெரியும்.. எப்போது ஒருவனுக்கு திடீரென வலிமை திரள்கிறதோ, அது அவனது உள்வலிமையாக மட்டுமே இருக்க முடியும். அந்த நேரத்தில் அவனை அடித்தால் , அவன் மீண்டெழுவது கடினம்.

லக்‌ஷ்மணனும், இந்திரஜித்தும் கடுமையாகப் போரிடுகின்றனர்.  இந்திரஜீத்தின் ,ஆயிரம் குதிரைகள் கொண்ட தேர் சிதைபடுகிறது.  அவன் தேர்ப்ப்பாகனை லக்‌ஷ்மணன் கொல்கிறான்.   இந்திரஜித்தின் கை வெட்டுப் படுகிறது.

திடீரென இந்திரஜித் அனைத்து சக்தியும் ஒருங்கிணைத்து எழுகிறான். லட்சுமணன் அந்த கோலத்தைக் காண்கிறான். ’இவன் தலையைக் கொய்யும் காலம் இதுவே’ என ஒரு சக்திவாய்ந்த அம்பினை அவன் தலைமீது எய்கிறான்.  

” காற்று என, உரும் ஏறு என்ன, கனல் என, கடை நாள் உற்ற

கூற்றம் ஓர் சூலம் கொண்டு குறுகியது என்ன, கொல்வான்

தோற்றினான்; அதனைக் காணா, 'இனி, தலை துணிக்கும் காலம்

ஏற்றது' என்று, அயோத்தி வேந்தற்கு இளையவன் இதனைச் செய்தான்”

இதுவே தகுந்த தருணமென அவனுக்குத் தோன்றியதன் காரணம், திடீரென சக்திகொண்டு எதிரி எழுந்ததுதான். லட்சுமணன் போர் உத்திகளில் விற்பன்னன். இந்த நிகழ்வில் அவன் முடிவு செய்துவிடுகிறான்.

எப்போ, கொச்சிக்க்கு , மற்ற இடங்களிலேர்ந்து ஆட்களை அனுப்பினானோ, அப்போ சந்திரா  இறுதிக்கட்டத்துக்கு வந்துவிட்டான் என்பதை அறிந்தேன். அவனது மற்ற சக்தி இருப்பிடங்களை நம் வசமாக்கினேன்.

இராமாயணமும், மகாபாரதமும் எத்தனையோ சொல்லிக்கொடுக்கின்றன. நாம்தான் கவனிப்பதில்லை” சொல்லிக்கொண்டே வந்தவர் , செல்போன் அடிக்க , எடுத்து விலகி நடந்தார்.

சற்று தொலைவில் அவர் பேசுவது கேட்டது “ காயத்ரி, அழாதே. மங்களூர் நல்ல ஊர்தான். சந்திரா, கடும் உழைப்பாளி. முன்னேறிவிடுவான். கொஞ்சம் பொறுமையாக இரு. என் தங்கைதான் சரஸ்வதி வித்யாலயாவின் ஹெட் மிஸ்ட்ட்ரஸ்.  உன் குழந்தைகளுக்கு அங்கே ஸீட் சொல்லியிருக்கேன். நீ புத்திசாலி. சமாளித்துவிடுவாய் டீச்சர் வேலைக்குப் போவியா? சொல்லட்டுமா?”

”….”

“அவனை எதிர்ப்பது என்  தொழில் தருமம், காயத்ரி. துரோணனோ, பீஷ்மனோ அர்ஜூனனை நோக்கி விட்ட அம்புகளிலும் அன்பு இருந்தது.இல்லேன்னா, அம்புப்படுக்கைல இருந்தும் பீஷ்மன் ,எப்படி ஆட்சி நடத்தணும்னு, தருமனுக்கு அறிவுரை சொல்லுவானா?”

சாரதியை அன்றுமுதல் வித்தியாசமாகப் பார்க்கத் தொடங்கினேன்.

பி.கு : வரைபடங்கள் எடுத்துக்காட்டுக்கு மட்டுமே. இவை இணையத்திலிருந்து எடுக்கப்பட்டவை.